È una notte di paradiso, questa: ogni cuore si sente traboccare d'allegria, perché nella grotta è nato il Bambino per liberarci dall'inferno.
Notte de chelu es custa: dogni sinu
de allegria si sentit bundhare,
ca in sa grutta es nadu su Bambinu,
dai s'inferru pro nos liberare.
Es nadu, es nadu, es nadu su Bambinu!
enide, enide totu a l'ammirare!
enide a l'adorare — e a l'amare!
Isse ha lassadu su chelu lughente,
ed es bennidu a sa grutta a penare:
che fizigheddhu de povera zente:
e fit su Fizu de su Re divinu!
Subr'a sa paza l'hana collocadu,
ca no b'haiat laccu, a reposare.
Ma sos Anghèlos l'han accortejadu
tra sas istellas fattendhe caminu.
Pustis sun sos pastores accudidos,
che poverittos a lu saludare:
e tra lughes de chelu si sun bidos,
e totue han bid'oro in su terrinu.
Pannos no ha sa Mama a lu 'estire:
but sa lughe l'ha cherfidu ammantare:
no ha prendhas de oro a si frunire,
m'ha totu, astros e mundhos, in destinu.
Leat sa paza sa manuzza santa
e l'isparghet in terra pro giogare...
e in oro si giambat totaganta,
e fiorid in rosa e in germinu.
Girat s'ojuzzu subra 'e sos muros,
e i sas pedras ndhe faghet brillare:
mirat sos coros tristos e iscuros,
e b'allughet incantos de giardinu.
Ha risu bellu chei s'aurora,
ch'ogni tempesta faghed abblacare:
chie no ischid it'es paghe ancora,
de l'adorare fattat determinu!
Poveros, riccos, mannos e minores,
fattemus festa in giru a cuss'altare.
Che a sos cherubinos e pastores
Gesùs nos ponzat su chelu in su sinu!
Testo: Can. Pietro Casu · Musica: Can. Agostino Sanna · Berchidda, 1927