Andiamo alla grotta accesa di luce, perché è nato il Bambin Gesù, nostro Signore, Re divino.
Andhemus a sa grutta,
de lughe tot'allutta,
ch'es nadu su Bambinu
Gesùs, Segnore nostru, Re divinu.
Es nadu poverittu:
suffrit famin'e frittu:
sa Mama no ha pannos
pro lu fascare, e vived in affannos.
Ma enid un'istolu
de Anghelos a bolu,
e l'istan affestendhe,
dulzes innos de gloria cantendhe.
E dai sos lugores
giamados, sos pastores,
ruen imbenujados,
a tantas meravizas incantados.
Sos tres Res de levante
s'istella caminante
sighendhe enin cun coro:
e li donan inzensu, mirra e oro.
Ma Erodes crudele,
inzegadu 'e fele,
bocchit sos innozentes
in brazzos a sas mamas e parentes.
Sos gridos de piantu
turban su Nignu Santu,
chi giamat cumpagnia
pro li dare discansu e allegria.
Nois Beniaminas
sas giamadas divinas
cuntentas iscultamus,
e in giru a sa grutta l'affestamus.
Si no hamus ricchesza,
li damus sa puresa,
totu s'amor' 'e sinu,
che profumu 'e rosas in giardinu.
E Gesùs nos ha caras:
nos riet cun sas laras,
nos dat sas manos santas,
nos chered a su chelu totugantas!
Testo: Can. Pietro Casu · Musica: Can. Agostino Sanna · Berchidda, 1927